Takengon- sarupena.co.id
Hasrin Z Bersah
Lues rupen donya
Uten murime mubelang raya
Tikik sitelas ku mata
Enti renye iseta urum jengkal ni jejari
Dele rupen ilmu
Bumi mubentang langit musupu
Sekecal amat ni pumu
Enti renye behu munuruhen diri
Naru rupen jelen
Lempang lesuh mutekongen
Jarak ilen tujuen
Enti renye gerjen muniro mari
Kolak rupen daling
Sesuk tegep mampat beriring
Dele silepas kin rering
Enti renye keruping turah i mai
Ara rupen ampang
Rempak besusun alas ketopang
Lepas ilen i denang
Enti renye ku para buang kase betuni
Simen ilen uwah
Ara simelep dele siteridah
Selese jerohe besikah
Enti renye i emah sigere tegunei
Mukamang ilen manuk
Temerbang atas ngenali pucuk
Mentalu laing ni merbuk
Enti renye punguk i kalei
Rempak ilen re
Mutentu naru konotpe
Mepat nge benyere
Enti renye taone orop mupari
Takengen, 13 Juli 2025
